रोल्पा । प्रतिनिधिसभा निर्वाचनको पूर्वसन्ध्यामा पुष्पकमल दाहाल ‘प्रचण्ड’ले आज रोल्पाबाट अन्तिम सार्वजनिक चुनावी सम्बोधन गर्ने भएका छन्।

नेपाल कम्युनिस्ट पार्टीका संयोजकसमेत रहेका पूर्वप्रधानमन्त्री दाहालले आज दिउँसो रोल्पाको सदरमुकाम लिबाङस्थित टुँडिखेलमा आयोजित चुनावी सभालाई सम्बोधन गर्ने कार्यक्रम तय भएको पार्टी स्रोतले जनाएको छ।

पार्टीका जिल्ला इन्चार्ज राजबहादुर बुढाका अनुसार निर्वाचनअघि देशभर ठूलो कार्यक्रम नरहेको अवस्थामा रोल्पाबाटै निर्णायक सन्देश दिने तयारी गरिएको हो। लिबाङमा आयोजना हुने सभामा करिब १५ हजारभन्दा बढी कार्यकर्ता तथा सर्वसाधारण सहभागी हुने आयोजकको दाबी छ।

ऐतिहासिक सन्दर्भसँग जोडिएको सम्बोधन

दश वर्षे जनयुद्धको थालनी रोल्पाबाटै भएको ऐतिहासिक पृष्ठभूमिलाई मध्यनजर गर्दै प्रचण्डले रोल्पालाई सम्बोधनको थलो बनाएका हुन्। जनयुद्धका अधिकांश समय उनले रोल्पामै बिताएका थिए। पार्टी नेतृत्वका अनुसार रोल्पाबाट अन्तिम सम्बोधन गर्नु राजनीतिक तथा भावनात्मक दुवै दृष्टिले अर्थपूर्ण कदम हो।

शीर्ष नेताहरूको उपस्थिति

आजको सभामा रुकुम पूर्वबाट प्रतिनिधिसभा सदस्यका उम्मेदवार वर्षमान पुनले पनि सम्बोधन गर्ने कार्यक्रम छ। साथै पूर्वसभामुख कृष्णबहादुर महरा, पूर्वसभामुख ओनसरी घर्तीमगरलगायत केन्द्रीय नेताहरूको उपस्थिति रहने जनाइएको छ।

निर्वाचनको अन्तिम चरणमा प्रवेश गरिसकेको अवस्थामा रोल्पाबाट हुने आजको सम्बोधनलाई नेकपाले शक्ति प्रदर्शन र अन्तिम चुनावी सन्देशका रूपमा लिएको छ।