काठमाडौं । राष्ट्रपति Ramchandra Paudel ले योगलाई केवल व्यायामका रूपमा नभई समग्र जीवनशैलीका रूपमा अंगीकार गर्न सबै नेपालीलाई आग्रह गरेका छन्।
विश्व योग दिवसको अवसरमा शुभकामना सन्देश जारी गर्दै उनले योगले शरीर, मन र आत्माबीच सन्तुलन कायम गर्न महत्वपूर्ण भूमिका खेल्ने बताए। ध्यान, प्राणायाम तथा विभिन्न शारीरिक आसनको संयोजनबाट योगले मानसिक शान्ति, सकारात्मक सोच र स्वस्थ जीवनयापनमा सहयोग पुग्ने उनको भनाइ छ।
राष्ट्रपतिले योगलाई वैज्ञानिक जीवनपद्धतिको रूपमा विकास गर्नुपर्ने आवश्यकता औंल्याउँदै यसको अभ्यासले दैनिक कार्यक्षमता वृद्धि हुनुका साथै रोग प्रतिरोधात्मक क्षमता र पाचन प्रणालीलाई समेत मजबुत बनाउने विश्वास व्यक्त गरे।
उनले नेपाललाई योगसँग जोडिएको ऐतिहासिक तथा सांस्कृतिक भूमि भएको उल्लेख गर्दै योगसम्बन्धी अध्ययन, अनुसन्धान र प्रवर्द्धनलाई थप प्राथमिकता दिनुपर्ने धारणा राखे। साथै योगलाई राष्ट्रिय नीति, शैक्षिक पाठ्यक्रम र जनस्वास्थ्यका कार्यक्रमसँग प्रभावकारी रूपमा जोड्न आवश्यक रहेको बताए।
सन्देशमा राष्ट्रपति पौडेलले आधुनिक जीवनशैलीका कारण बढ्दै गएको तनाव, प्रदूषण र प्रतिस्पर्धात्मक वातावरणबाट प्रभावित मानव जीवनलाई स्वस्थ, सहज र सन्तुलित बनाउन योग उपयोगी माध्यम बन्न सक्ने उल्लेख गरेका छन्।
उनले विश्व योग दिवसले सबैमा सकारात्मक ऊर्जा सञ्चार गर्दै शारीरिक, मानसिक, भावनात्मक तथा आध्यात्मिक रूपमा स्वस्थ र सुखी जीवन बिताउन प्रेरणा प्रदान गरोस् भन्ने शुभकामना व्यक्त गरेका छन्।
Comments are closed