काठमाडौँ । नेकपा एमालेका नेता सुरेन्द्र पाण्डेले अबको एमाले ‘बन्द कोठा’ को षड्यन्त्र वा केही सीमित व्यक्तिको क्याल्कुलेसनबाट नभई आम कार्यकर्ताको भावना र आधुनिक कार्य पद्धतिबाट चल्नुपर्ने बताएका छन् । मंगलबार साँझ सामाजिक सञ्जाल फेसबुकमा नेतृत्वप्रति लक्षित गर्दै  पाण्डेले यस्तो बताएका हुन् ।

बैठक सुन्ने र सुध्रिने थलो नभई सुनाउने र ‘हुकुम’ दिने औपचारिकता बन्दा विवेकको मृत्यु हुने र अहङ्कारले ठाउँ पाउने समेत उनले बताए ।

उनले भने,‘पार्टीका कुरा बैठकमा गर्ने कि सामाजिक सञ्जालमा?’ यो जायज प्रश्न हो । हामीले पार्टीका आधिकारिक फोरम र बैठकहरूमा पटक–पटक सुधारका ठोस मार्गचित्र प्रस्तुत गर्‍यौँ र गल्तीहरू औँल्यायौँ। ती आवाजहरूलाई गम्भीरतापूर्वक सुन्नु र छलफल गर्नुको साटो नोट अफ डिसेन्टको एउटा कुनामा मात्र सीमित गरियो। जब बैठक सुन्ने र सुध्रिने थलो होइन, केवल सुनाउने र हुकुम दिने औपचारिकता मात्र बन्छ, तब त्यहाँ विवेकको मृत्यु हुन्छ र अहङ्कारले ठाउँ पाउँछ ।’