काठमाडौं । आगामी प्रतिनिधि सभा निर्वाचन–२०८२ लाई लक्षित गर्दै नेपाली कम्युनिष्ट पार्टी ले “व्यवस्था बदल्यौँ, अब अवस्था बदल्छौँ” भन्ने मूल नारासहित चुनावी सन्देश सार्वजनिक गरेको छ।

पार्टीले आफ्नो सन्देशमार्फत विगतका राजनीतिक परिवर्तन—राजतन्त्रको अन्त्यदेखि संघीय लोकतान्त्रिक गणतन्त्र स्थापना सम्म—जनआन्दोलन र क्रान्तिकारी संघर्षबाट सम्भव भएको स्मरण गराउँदै अब त्यसको प्रतिफल जनताको दैनिक जीवनमा देखिने गरी आर्थिक–सामाजिक रूपान्तरण आवश्यक भएको जनाएको छ।

नेकपाका अनुसार, व्यवस्था परिवर्तनपछि पनि जनताको जीवनस्तर अपेक्षाअनुसार उकासिन नसक्दा निराशा बढेको छ। यही अवस्थालाई सम्बोधन गर्न पार्टीले अब राजनीतिक बहसभन्दा बढी परिणाममुखी शासन, उत्पादनमुखी अर्थतन्त्र र सुशासनमा केन्द्रित हुने प्रतिबद्धता व्यक्त गरेको छ।

पार्टीले कृषि, उद्योग, ऊर्जा र पर्यटन क्षेत्रमा उत्पादन वृद्धि गरी रोजगारी सिर्जना गर्ने, आयातमा निर्भर अर्थतन्त्रलाई आत्मनिर्भर बनाउने तथा भ्रष्टाचार नियन्त्रणका लागि कडा कदम चाल्ने योजना अघि सारेको छ। साथै, सामाजिक विभेद अन्त्य, समान अवसर सुनिश्चितता र जनताको घरदैलोमै सेवा प्रवाह गर्ने लक्ष्य पनि सन्देशमा उल्लेख गरिएको छ।

नेकपाले वैज्ञानिक समाजवादलाई दीर्घकालीन उद्देश्यका रूपमा प्रस्तुत गर्दै राजनीतिक परिवर्तनलाई आर्थिक समृद्धि र सामाजिक न्यायसँग जोड्ने प्रयास गर्ने जनाएको छ।

सन्देशको निष्कर्षमा पार्टीले मतदातासँग आग्रह गर्दै अबको निर्वाचन केवल सत्ता परिवर्तनको होइन, जनजीवनमा ठोस सुधार ल्याउने दिशातर्फको निर्णय हुने बताएको छ।