ललितपुर । राष्ट्रिय सहकारी बैंक लिमिटेडको २४औँ स्थापना दिवसको अवसरमा देशभरका सातै प्रदेशमा एकैसाथ “सहकारी पुनर्जागरण : चुनौतीलाई अवसरमा बदल्ने रणनीति, कानुनी परिवर्तन र समाधानको योजना“ विषयक प्रदेशस्तरीय गोष्ठी सम्पन्न भएको छ ।

स्थापना दिवसको अवसरमा आयोजित गोष्ठीहरूमा सहकारी क्षेत्रको वर्तमान अवस्था, नियामकीय सुधार, वित्तीय सुदृढीकरण, सुशासन, जोखिम व्यवस्थापन तथा सहकारी पुनर्जागरणका विषयमा व्यापक छलफल एवम् अन्तरक्रिया गरिएको थियो । बैंकले सदस्य सहकारी संघ/संस्थाहरुको संस्थागत क्षमता अभिवृद्धि, गुणस्तरीय वित्तीय तथा गैर-वित्तीय सेवा विस्तार तथा सदस्य संघ÷संस्थाहरुसँगको सहकार्यलाई थप सुदृढ बनाउने प्रतिबद्धता व्यक्त गरेको छ ।

बागमती प्रदेशमा आयोजित गोष्ठीको उद्घाटन सहकारी विभागका रजिस्ट्रार बाबुराम गौतमले गर्नुभएको थियो । बैंकका अध्यक्ष लक्ष्मीप्रसाद उप्रेतीको अध्यक्षतामा सम्पन्न कार्यक्रममा राष्ट्रिय सहकारी नियमन प्राधिकरणका निवर्तमान विज्ञ सदस्य डा. रमेश चौलागाईंले “सहकारीको परिवर्तित नियामकीय कार्यदिशा“ तथा बैंकका प्रमुख कार्यकारी अधिकृत बद्रीकुमार गुरागाईंले “सहकारी बैंक ः विगतदेखि वर्तमानसम्म“ विषयमा प्रस्तुतीकरण गर्नुभएको थियो । कार्यक्रममा राष्ट्रिय सहकारी नियमण प्राधिकरणका कार्यकारी निर्देशक राम कुमार महतो र नेपाल बचत तथा ऋण केन्द्रीय संघका अध्यक्ष चन्द्र ढकालले शुभकामना मन्तव्य राख्नु भएको थियो ।

कोशी प्रदेशमा आयोजित कार्यक्रमको उद्घाटन उद्योग, कृषि तथा सहकारी मन्त्री ईस्राईले मन्सुरीले गर्नुभएको थियो । बैंकका सञ्चालक परितोष पौडेलको अध्यक्षतामा सम्पन्न कार्यक्रममा प्रदेश सहकारी रजिस्ट्रार भूपेन्द्र खनाल र बैंकका नायब प्रमुख कार्यकारी अधिकृत प्रकाश कुमार अधिकारीले प्रस्तुतीकरण गर्नुभएको थियो । कार्यक्रममा राष्ट्रिय सहकारी महासंघ, विभिन्न केन्द्रीय सहकारी संघ, प्रदेशस्तरीय सहकारी संघ/संस्थाका प्रमुख एवम् प्रतिनिधिहरुको सहभागिता रहेको थियो ।

त्यसैगरी मधेश प्रदेशमा आयोजित कार्यक्रममा भूमि व्यवस्था, कृषि तथा सहकारी मन्त्रालयका सचिव डा. सञ्जयकुमार यादवले उद्घाटन गर्नुभएको कार्यक्रममा बैंककी सञ्चालक मन्दिरा आचार्यले अध्यक्षता गर्नुभएको थियो । प्रदेश सहकारी रजिस्ट्रार रूपेशकुमार साह तथा बैंकका मधेश प्रदेश प्रमुख प्रभु पोखरेलले सहकारी क्षेत्रको वर्तमान अवस्था र बैंकको भूमिकाबारे प्रस्तुतीकरण गर्नुभएको थियो ।

गण्डकी प्रदेशमा भूमि, कृषि तथा सहकारी मन्त्री भीमबहादुर कार्कीले उद्घाटन गर्नुभएको कार्यक्रममा बैंककी सञ्चालक कमलादेवी गिरीको अध्यक्षता रहेको थियो । प्रदेश सहकारी रजिष्ट्रार कार्यालयका निमित्त रजिष्ट्रार नारायणप्रसाद ढकाल तथा बैंकका गण्डकी प्रदेश प्रमुख रुक्मत श्रेष्ठले प्रस्तुतीकरण गर्नुभएको थियो । कार्यक्रममा जिल्ला तथा केन्द्रीय सहकारी संघका प्रतिनिधिहरूको उल्लेखनीय सहभागिता रहेको थियो ।

लुम्बिनी प्रदेशको दाङमा आयोजित गोष्ठीको उद्घाटन प्रदेशका कृषि, भूमि व्यवस्था तथा सहकारी मन्त्री तुलसीप्रसाद चौधरीले गर्नुभएको थियो । बैंकका सञ्चालक विष्णुप्रसाद बरालको अध्यक्षतामा सम्पन्न कार्यक्रममा प्रदेश रजिष्ट्रार मञ्जु पाण्डे र बैंकको प्रदेश प्रमुख किरण खत्रीले प्रस्तुतीकरण गर्नुभएको थियो । कार्यक्रममा राष्ट्रिय सहकारी महासंघका पदाधिकारी, नियामक निकायका प्रतिनिधि तथा सहकारी अभियन्ताहरूको उपस्थिति रहेको थियो ।

कर्णाली प्रदेशमा भूमि व्यवस्था, कृषि तथा सहकारी मन्त्री विनोदकुमार शाहले उद्घाटन गर्नुभएको कार्यक्रममा बैंकका सञ्चालक कालीबहादुर महताराको अध्यक्षता रहेको थियो । प्रदेश सहकारी रजिष्ट्रार शुमानन्द अर्याल तथा बैंकको सुर्खेत शाखाका प्रमुख सागरनाथ योगीले प्रस्तुतीकरण गर्नुभएको थियो ।

सुदूरपश्चिम प्रदेशमा सहकारी रजिष्ट्रार तथा प्रशिक्षण कार्यालय धनगढीकी रजिष्ट्रार जयन्ती गिरीले कार्यक्रम उद्घाटन गर्नुभएको थियो । बैंकका सञ्चालक मनमोहन विष्टको अध्यक्षतामा सम्पन्न कार्यक्रममा रजिष्ट्रार जयन्ती गिरी तथा बैंकका सुदूरपश्चिम प्रदेश प्रमुख हिरालाल सुनारले प्रस्तुतीकरण गर्नुभएको थियो । कार्यक्रममा सहभागीहरूले सहकारी क्षेत्रको दिगो विकास, सुशासन, वित्तीय अनुशासन, जोखिम व्यवस्थापन तथा जनविश्वास अभिवृद्धिका विषयमा धारणा राखेका थिए ।

नेपाल सरकारको समेत शेयर लगानीमा २०६० असार २५ गते स्थापना भएको बैंकले हाल देशभर ५७ शाखा कार्यालयमार्फत १६ हजार ५२० सहकारी संघ/संस्थालाई सदस्यका रूपमा सेवा प्रदान गर्दै आएको छ ।

स्थापना दिवसको अवसरमा बैंकले आफ्ना संस्थापक, सदस्य सहकारी संस्था, नेपाल सरकार, नियामक निकाय, सहकारी अभियन्ता तथा सम्पूर्ण शुभेच्छुकप्रति कृतज्ञता व्यक्त गरेको छ ।

बैंकका अध्यक्ष लक्ष्मीप्रसाद उप्रेतीले २३ वर्षको यात्रा, उपलब्धि, चुनौती, अनुभव तथा सदस्यहरूको विश्वास नै बैंकको प्रमुख शक्ति रहेको उल्लेख गर्दै आगामी दिनमा सहकारी क्षेत्रको वित्तीय सुदृढीकरण, संस्थागत क्षमता विकास, सुशासन प्रवद्र्धन, डिजिटल रूपान्तरण, वित्तीय समावेशीकरण तथा दिगो विकासप्रति बैंक प्रतिबद्ध रहने बताउनुभयो ।

उहाँले सदस्य केन्द्रित सेवा, उत्पादनशील क्षेत्रमा लगानी विस्तार, उद्यमशीलता प्रवद्र्धन तथा नवप्रवर्तनमैत्री वित्तीय सेवामार्फत सहकारी संघ/संस्थाको विश्वसनीय वित्तीय साझेदारका रूपमा अझ प्रभावकारी भूमिका निर्वाह गर्दै सहकारी आन्दोलनको सुदृढीकरण र सदस्य समृद्धिका लागि बैंक निरन्तर क्रियाशील रहने प्रतिबद्धता व्यक्त गर्नुभयो ।

स्थापना दिवसका अवसरमा सातै प्रदेशमा आयोजित कार्यक्रममा बैंकको २२औँ वार्षिक साधारणसभाबाट प्रदेशस्तरमा उत्कृष्ट घोषित सहकारी संस्थाहरूले सफलताका अनुभव प्रस्तुत गरेका थिए भने सम्पूर्ण कार्यक्रमको सञ्चालन बैंकका महिला कर्मचारीहरूले गर्नुभएको थियो ।