काठमाडौं । जिल्ला प्रहरी परिसर काठमाडौंले २०८३ साल साउन महिनामा अपराध अनुसन्धान तथा नियन्त्रणतर्फ उल्लेख्य प्रगति भएको जनाएको छ। परिसरले सार्वजनिक गरेको साउन महिनाको प्रगति विवरणअनुसार एक महिनामा विभिन्न प्रकृतिका ९९७ वटा मुद्दा दर्ता भएका छन्।
दर्ता भएका मुद्दामध्ये जघन्य तथा गम्भीर अपराधका १४०, महिला, बालबालिका तथा ज्येष्ठ नागरिकसँग सम्बन्धित ४२, चोरीसम्बन्धी १२२, आर्थिक अपराधका ४३९ र अन्य प्रकृतिका २५४ वटा मुद्दा रहेका छन्।
परिसरका अनुसार साउन महिनामा सम्पत्ति शुद्धीकरणसम्बन्धी एक मुद्दा दर्ता गरी तीन जना प्रतिवादीमाथि अनुसन्धान गरिएको छ। त्यस्तै हुण्डीसम्बन्धी कसुरमा पनि एक मुद्दा दर्ता गरी अनुसन्धान अघि बढाइएको छ।
अनलाइन जुवामा संलग्नमाथि कारबाही
प्रहरीले साउन महिनामा अनलाइन जुवा (सट्टाबाजी) खेल्ने तथा खेलाउनेविरुद्ध समेत कारबाही गरेको जनाएको छ। विभिन्न स्थानमा अनलाइन सट्टाबाजी भइरहेको सूचनाका आधारमा प्रहरीले छापा मारेर केही व्यक्तिलाई नियन्त्रणमा लिएको थियो।
प्रहरीका अनुसार 1xBet लगायतका बेटिङ वेबसाइट प्रयोग गरी कारोबार गर्ने व्यक्तिहरूमाथि अनुसन्धान भइरहेको छ। यस क्रममा रु. २ लाख ६ हजारभन्दा बढी रकम तथा क्रिप्टोकरेन्सी कारोबारसँग सम्बन्धित ७९ हजार ६८.६५ USDT बराबरको कारोबार देखिएको प्रहरीले जनाएको छ। थप अनुसन्धानका लागि पक्राउ परेकाहरूलाई अदालतबाट म्याद थप गरी अनुसन्धान अघि बढाइएको छ।
लागूऔषध र गाँजासहित पक्राउ
साउन महिनामा प्रहरीले लागूऔषध कारोबार तथा ओसारपसारविरुद्ध पनि कारबाही गरेको छ। चन्द्रागिरी क्षेत्रमा लागूऔषधसहित एक जना पक्राउ परेका छन् भने गोकर्णेश्वर क्षेत्रमा २३ किलो १२० ग्राम गाँजासहित दुई जना पक्राउ परेको परिसरको विवरणमा उल्लेख छ।
त्यस्तै लागूऔषध तथा नगदसहित मानिस पक्राउ, कर्तव्य ज्यानसम्बन्धी कसुरमा संलग्न व्यक्तिको पक्राउ र चोरीका घटनामा संलग्न व्यक्तिमाथि समेत अनुसन्धान गरिएको प्रहरीले जनाएको छ।
चोरीका घटनामा पनि अनुसन्धान तीव्र
काठमाडौंका विभिन्न स्थानमा चोरी भएका सुनका गहना तथा अन्य सामग्रीको खोजी तथा अनुसन्धानका क्रममा प्रहरीले केही व्यक्तिलाई नियन्त्रणमा लिएको छ। चोरीमा प्रयोग भएको औजारसहित पक्राउ परेकामाथि थप अनुसन्धान भइरहेको परिसरले जनाएको छ।
यसैगरी पेस्तोलसहित एक जना पक्राउ परेका छन्। काठमाडौं महानगरपालिका–९ बानेश्वर क्षेत्रमा हातहतियार लुकाइछिपाइ राखेको सूचनाका आधारमा प्रहरीले एक जनालाई नियन्त्रणमा लिएको हो।
फैसला कार्यान्वयनतर्फ ४३५ जना पक्राउ
परिसरको तथ्यांकअनुसार साउन महिनामा फैसला कार्यान्वयनतर्फ ४३५ जना फरार प्रतिवादी पक्राउ परेका छन्। पक्राउ परेकाहरूबाट ८२ वर्ष ७ महिना कैद र रु. ११ करोड ३६ लाख ५९ हजार ३७१ जरिवाना असुलउपर गर्नुपर्ने देखिएको छ।
त्यस्तै चालु मुद्दाका क्रममा ७८ महिला र ७३० पुरुष गरी जम्मा ८०८ जना पक्राउ परेका छन्।
महिला, बालबालिका तथा ज्येष्ठ नागरिकसँग सम्बन्धित उजुरीतर्फ घरेलु हिंसाका १९९ उजुरी दर्ता भएकामा १९८ वटा मिलापत्र भएका छन्। यस्तै ठाडो निवेदनतर्फ १२४ उजुरी दर्ता भई सबै १२४ वटा मिलापत्र भएको प्रहरीको विवरणमा उल्लेख छ।
जिल्ला प्रहरी परिसर काठमाडौंले अपराध नियन्त्रण, अनुसन्धान तथा शान्ति सुरक्षा कायम गर्ने कार्यलाई प्राथमिकताका साथ अघि बढाइएको जनाएको छ। परिसरले साउन महिनाको प्रगति विवरण सार्वजनिक गरेको विषयलाई आफ्नो आधिकारिक माध्यमबाट पनि सार्वजनिक गरेको छ।
Comments are closed